Машин техник

Дахиад Приусын тухай

Posted on April 14, 2016 by admin

Хямралтай үеийн хамгийн эрэлт хэрэгцээтэй унаагаар Приус шалгарч байна. Иймээс уншигчиддаа 2016 оны Приус машины талаарх сонирхолтой мэдээллүүдийг хүргэхийг зорилоо. Монголчуудын Приус 40 хэмээн нэрлээд байгаа энэ машин өмнөх загваруудаас чухам юугаараа ялгаатай талаар эндээс мэдэж авах болно. Үнэндээ Prius XW50 гэсэн нэртэй тул Приус 50 гэх нь илүү тохиромжтой биз ээ.

1. Хөдөлгүүрүүдийн чадлын хуваарилалтыг сайжруулжээ. 1.8 литрийн 4 цилиндртэй хөдөлгүүр, хоёр цахилгаан хөдөлгүүр, СиВиТи хурдны хайрцаг зэрэг нь өмнөх загвараас өөрчлөгдөөгүй боловч тэдгээрийн хоорондын үр дүнтэй ажиллагааг нэмэгдүүлсэн байна. Дотоод шаталтын хөдөлгүүрийн эд ангийн үрэлтийг багасгаснаар ашигт үйлийн коэффицентийг 40 хувьд хүргэжээ. Мөн хөдөлгүүрээс гарах утааны дулааныг буцаан ашигласнаар шатахуун агаарын холимогийг хамгийн зохистой хэмжээнд барих боломж бүрдсэн байна. Түүнчлэн утааны халууныг хөргөлтийн шингэн буюу тосоолыг түргэн халаахад зарцуулдаг болжээ. Ингэснээр хүйтэнд машинаа халаах гэж удаан хүлээх шаардлагагүй боллоо гэсэн үг.

2. Литийн ионы зай хураагуур. Өмнөх загваруудад никел-металлын гидратын зай хураагуурыг хэрэглэдэг байсан бол энэ шинэ загварт литийн ионы зай хураагуурыг ашиглах болжээ. Хуучин зай хураагуур арын багажны хэсэгт ихээхэн зай эзэлсэн овоо жинтэй эд байсан. Харин литийн ионы зай хураагуур нь хөнгөн нимгэн болсон тул арын суудлын доогуур, шатахууны савтай зэрэгцэн байрлах болжээ.

3. 2016 оны загвар бусад загваруудаасаа шатахуунд хамгийн хэмнэлттэй нь болж чадсан. Хот дотор 100км-д 4.7л, шулуун замд 4.4л шатахуун зарцуулна. Машины салхи зүсэх чадвар болон жинг багасгасан нь үүнд бас түлхэц болсныг дурдах хэрэгтэй. Энэ машин жолоодлогын Normal Eco, EV, ба Power гэсэн 4 горимтой.Normal буюу хэвийн горимд шатахуун зарцуулалт ба хүчин чадлын зохистой харьцааг барьдаг. Хэрэв шатахуун зарцуулалтыг улам багасгая гэвэл Эко горимыг нь сонгох хэрэгтэй. Хурд хүч шаардлагатай бол Power горим дээр тавина. Энэ горимд мэдээж шатахуун зарцуулалт хамгийн их болно. Харин зөвхөн цахилгаан хөдөлгүүрээрээ явах шаардлагатай бол EV горимыг сонгоно. Гэхдээ цахилгаан хөдөлгүүрээр хоёроос гурван км л явж болно гэдгийг анхаараарай. Зай хураагуурын цэнэг огцом дуусах тул тун удахгүй хэвийн горимд шилждэг.

4. Хэрэв та Приус машин хөлөглөдөг бол өвөл хүйтэнд шатахуун зарцуулалт огцом ихэсдгийг мэдэх биз. Үүний нэг гол шалтгаан нь салооныг халаахын тулд ихээхэн шатахуун зарцуулдагт оршино. Гадаа хасах гуч, дөчин хэм хүрч хүйтрэхэд шатахуун зарцуулалт Сонатагаас дутахааргүй болдог шүү дээ. Приусын ихэнх хэрэглэгчид халуун дулаан оронд байдаг болохоор халаалалтад зарцуулах шатахуун талаар өмнөх загваруудад ер анхаараагүй байна. Харин шинэ загварт энэ тал дээр анхаарал хандуулжээ. Автомашины хамгийн их дулаан алддаг хэсэг бол урд буюу салхины шил. Салхины шилээр дулаан алдахыг багасгахын тулд дулаан тусгаарлах чадвартай тусгай шил сонгожээ. Мөн салооныг халаах цахилгаан халаагууртай болсон тул хүйтэнд машинаа халахыг хүлээн нормальдаж зогсох шаардлагагүй болсон. Хөдөлгүүр хангалттай халангуут цахилгаан халаагуур автоматаар сална. Мөн кабиныг бүхэлд нь халаахын оронд зорчигч сууж байгаа хэсгийг л халаах болсон байна.

5. Мэдээжээр аюулгүй байдал бол анхаарлын төвд ямагт байсаар ирсэн. Шинэ Приуст Safety Sens-P гэх аюулгүйн системийг суурилуулжээ. Хурдтай явж байх үед замаас огцом гарахаас сэргийлэх, холын гэрлийг автоматаар шилжүүлэх, мөргөлдөөнөөс сэргийлж тоормослох, эргэн тойрны саадыг радарын тусламжтайгаар мэдрэх, явган зорчигчийг таньж мөргөхөөс сэргийлэх гэх мэт үйлдлүүдийг автоматаар хийдэг гайхалтай ухаалаг систем юм байна.

6. Автоматаар өөрийгөө зогсоолд байрлуулж чадна. Машинуудтай зэрэгцүүлж, эсвэл замын хашлагад шахаж тавих үйлдлийн аль алийг нь гүйцэтгэж чадна. Гэхдээ зогсоолын цагаан шугам нь ойлгомжтой, тод харагдахуйц байх хэрэгтэй шүү. Мөн ойролцоо байгаа машин, эд юмсыг шүргэхгүйн тулд тусгай дохиолол хэрэглэдэг.

[post_view]

Машин авах гэж байгаа бол…

Posted on August 11, 2015 by admin

By IFCAR – Own work, Public Domain, https://commons.wikimedia.org/w/index.php?curid=16991970

Монгол бол эх газрын эрс тэс уур амьсгалтай орон. Өвлийн улиралд машинаа унаад явъя гэхэд олон бэрхшээл тулгарна. Замын халтиргаа, утаа униар, хөдөлгүүрийг тас хөлдөөм хүйтэн… Ихэнх машин үйлдвэрлэгч орнууд зөөлөн дулаан уур амьсгалтай тул тэсгим хүйтнийг тэсвэрлэх машин цөөхөн. Гэхдээ ямар үзүүлэлттэй машин сонговол илүү тохиромжтой талаар хэдхэн зөвлөгөө хүргэе:

Дөрвөн дугуйн хөтөлгөөтэй байх нь тун чухал. Ийм машин халтиргаа гулгаа, шавар намагт зүтгэх хүч сайн гаргана. Ихэнх жийпнүүд дөрвөн дугуйн хөтөлгөөтэй байдаг ч гэсэн бас дөрвөн дугуйн хөтөлгөөтэй жижиг тэрэгнүүд ч олон бий. Ийм машинууд 4WD, AWD мэт тэмдэглээтэй. 4WD нь 4 Wheel Drive, AWD нь All Wheel Drive гэсэн утгатай үгс юм.
Хүйтэнд удаан байсан машиныг асаах нь үнэхээр хэцүү байдаг билээ. Ассан ч гэсэн хөдөлгүүр тун хурдан элэгдаж мууддаг. Зарим машинууд цаанаасаа тавьсан хөдөлгүүрийн блок халаагчтай байдаг. Хөдөлгүүрийн блок халаагчтай сүүлийн үеийн машинууд гэвэл 2014 оны Acura MDX болон 2014 Ford Fusion зэрэг болно. Мөн Мерседесийн хуучны зарим дизел хөдөлгүүрт 220В-д залгадаг цахилгаан халаагчуудтай байдаг.
Суудлын халаагч бас л хэрэгтэй зүйлсийн нэг. Люкс ангиллын машинууд л ийм тоноглолтой байсан бол сүүлийн үед ердийн машинуудад ч урд болон арын суудалд нь халаагч тавих болжээ. Тэр ч байтугай жолооны хүрдэндээ халаагчтай машинууд хүртэл бий болов. Машины салооны халаагч суудлыг халаах хүртэл нэлээд хугацаа зарцуулдаг бол суудлын халаагч нь маш түргэн хугацаанд суудлыг халааж тав тухтай болгодогоороо давуу талтай юм.
Хүйтэнд тохиолддог бас нэг бяцхан бэрхшээл бол толь цантах явдал. Хүйтэнд урд цонхоо онгойлгоход л толь цантчихдаг. Мөн цас ороод толин дээр мөсөн бүрхүүл тогтох нь ч бий. Зарим машинд толины цанталтыг арилгахын тулд ар талд нь халаагч элемент наасан байдаг. Цан арилгах товчлуурыг дарахад хажуу талын толиноос гадна арын шилийн халаагч ч бас давхар ажиллахаар хийсэн байх нь элбэг.
Машиныг алсаас удирдаж асаах систем бас л хэрэгтэй тоноглолын нэг. Ийм асаалтын системийг ихэвчлэн тусад нь суулгадаг боловч сүүлийн үеийн машинуудад цаанаас нь тавьж суулгаж өгөх болжээ. Машиндаа сууж хөдлөхөөсөө өмнө машинаа асаачихна. Таныг машиндаа суухад салоон болон хөдөлгүүр халж, машин хөдлөхөд бэлэн болсон байна. 2014 оны Scion болон Мицубиши Мираж машинд ийм удирдлага бий.
Хүйтэнд цас, бороо орж тэр нь шил арчигчийг салхины шилтэй барьцалдуулан хөлдөөдөг. Шил арчигчаа ажиллуулбал боолт нь суларч холхихоос цаашгүй болно. Энэ асуудлыг шийдэхийн тулд шил арчигчид зориулсан тусгай халаагч хийх болжээ. 2014 оны Субару Форестер болон Тоёота 4 Раннер машинд ийм халаагч тавьсан байдаг.

Унадаг дугуйн хурдны дээд амжилт

Posted on August 7, 2015 by admin

Хамгийн хурдан дугуй.
Image credit: Bas de Meijer

Данийн оюутнуудын бүтээсэн унадаг дугуй хүний булчингийн хүчээр ажилладаг хамгийн хурдан унаагаар шалгарав. Тэдний бүтээсэн VeloX3 нь 133.78км/ц хурдалж Дэлхийн дээд амжилтыг шинэчлэн тогтоожээ. Уралдаан АНУ-ын Невадад зохион байгуулагддаг бөгөөд хүний булчингийн хүчээр хөдөлдөг бүхий л төрлийн унаанууд оролцдог юм. Унадаг дугуйг Данийн Делфт Их Сургууль болон Амстердамийн Их Сургуулийн оюутнууд хамтран бүтээж Себастян Бовиер унаж хурдлуулсан байна. Аль болох их хурдтай явахын тулд компьютерийн загварчлал ашиглаж дугуйчны хүчийг хуваарилж байсан гэнэ. Дугуйн бүрхүүлийг Формула-1 тэмцээний машиныг буддаг тусгай будгаар будаж агаарын эсэргүүцлийг бууруулжээ. Дугуйн өмнөх дээд амжилтыг Канадын иргэн Сам Уиттэнхэм эзэмшиж байсан бөгөөд шинэ дээд амжилтаас 0.6км/ц -аар дутуу юм байна. Доорх бичлэгээс Себастян Бовиер хэрхэн хурдалж байгааг үзээрэй.

Ниссаны цахилгаан машинууд

Posted on August 6, 2015 by admin

By IFCAR – Own work, Public Domain, https://commons.wikimedia.org/w/index.php?curid=17238574

Энэ удаа Ниссан компанийн үйлдвэрлэсэн цахилгаан машин Leaf (Навч) -ийг танилцуулахаар шийдлээ. Leaf нь зөвхөн цахилгаанаар ажилладаг гэдгээрээ онцлогтой, гэхдээ анхны цахилгаан машин биш л дээ. Харин цахилгаанаар ажилладаг машинуудын хувьд том ахиц дэвшил гаргасан гэдгээрээ онцлогтой юм. Нэгдүгээр үеийн Leaf_ийн хувьд онцгойроод байх юм байсангүй, бусад цахилгаан машины адил нэг цэнэглэлтээрээ хол зайд аялж чаддаггүй байв.

Харин хоёрдугаар үеийн Leaf үнэхээр ахиц дэвшилттэй болж нэг цэнэглэлтээр туулах зай нь үлэмж нэмэгдсэж 200км болжээ. Ер нь зөвхөн цахилгаанаар ажилладаг машины хувьд хамгийн чухал үзүүлэлт нь нэг цэнэглэлтээр туулах зам байдаг. Иймээс ч одоо худалдаанд гарч байгаа цахилгаан машинуудаас хамгийн сайн болж байна. Багааж болон салоон нь зай ихтэй тул бензин болон дизель хөдөлгүүртэй машинуудтай өрсөлдөхүйц болжээ. Дээд хурд нь 150км/ц хүрнэ. Түлш шатахуун хэрэглэдэггүй тул зардал маш бага гарна. Агаарын бохирдлын татвар ч төлөхгүй. Өдөр бүр цэнэглэж унадаг байхад л жилийн цахилгааны зардал нь 300 мянган төгрөг хүрэхтэй үгүйтэй. Ердийн тэрэгний хувьд сарын түлш шатахууны зардал үүнээс ч их гардагтай харьцуулахад хэмнэлттэй гэдэг нь илт.

Анх үйлдвэрлэж байхад Leaf-аас өөр цахилгаан машины сонголт үгүй байсан бол одоо Ниссаны цахилгаан машины хувилбарууд болох Visia+, Acenta болон Tekna худалдаанд гараад байна. Эдгээр бүх цахилгаан машин электрон тоног төхөөрөмжөөр сайн тоноглогдсон гэдгийг нэмж хэлэх хэрэгтэй. Тухайлбал бүгд Bluetooth болон USB холболтуудтай, түлхүүргүйгээр асаж явах боломжтой. Visia+ хувилбар нь ухрахын камер, хиймэл дагуулын навигацтай, хайлшин бултай, цонхнууд нь нарын гэрэл бууруулна. Харин Acenta хувилбар нь тоормослоходоо машины кинетик энергиэр зай хураагуураа цэнэглэдэг, цахилгаанд хамгийн хэмнэлттэй горимыг сонгон явах чадвартай.

Tekna хувилбар нь долоон өсгөгч бүхий аудио системтэй, машины эргэн тойрныг 360 градусаар камераар харах боломжтой, урд болон арын суудалдаа суудлын халаагчтай, 17 инчийн хайлшин бултай, ЛЕД их гэрэлтэй юм байна.

Land Cruiser

Posted on May 27, 2015 by admin

Энэхүү гайхамшигтай төмөр хүлгийг 1954 оноос эхлэн үйлдвэрлэж буй. Анхны загварыг зохион бүтээхэд 3 жилийн хугацаа зарцуулсан байдаг. Цэрэг дайны зориулалтаар, цэргийнхний захиалгаар эхлэн бүтээсэн түүхтэй. Одоо Land Cruiser–ийг олон зориулалтад тохируулан янз бүрийн хэлбэр загвартайгаар үйлдвэрлэж байна. Их гарын жийп ангиллын машинууд дотор найдвартай, эдэлгээтэйгээрээ гайхагддаг. Манайхан Land Cruiser 80, Land Cruiser 100, Land Cruiser 200 загваруудыг сайн мэдэх билээ. Тэгвэл анхны загварыг ердөө 1 жилийн хугацаанд үйлдвэрлээд 1955 оноос хоёрдахь загвар буюу Land Cruiser 20–ийг хийж эхэлсэн байна. Land Cruiser–20 нь иргэний зориулалтайгаар бүтээгджээ.

Land Cruiser 20

By wallerdog (Own work) [CC BY-SA 3.0 (https://creativecommons.org/licenses/by-sa/3.0)], via Wikimedia Commons

Экспортод ихээхэн хэмжээгээр гаргах зорилготойгоор өмнөх дайны зориулалтайг бодвол илүү загварлаг үзэмжтэй байхаар хэлбэрийг нь шийдсэн байна. Хоёр тэнхлэг нь хоёул нумтай, 3.9 литрийн багтаамжтай хөдөлгүүртэй, гурван шатлалтай хурдны хайрцагтай байв.

Land Cruiser 40
1960 онд Land Cruiser 20 загварыг илүү шинэчлэн сайжруулсан хувилбар болох Land Cruiser 40–ийг үйлдвэрлэж эхэлжээ. Хурдны хайрцаг нь 3 шатлалтай хэвээр үлдсэн боловч давхар мосттой болжээ. Энэ загварт 4.2 литрийн хүчирхэг бензин хөдөлгүүрийг тавьсан. 1974 онд анх дизел хөдөлгүүрийг Land Cruiser–т тавьжээ. Мөн жолооны гидро хүчлүүр, дискэн тоормос зэргийг тавьснаар нэлээд болхидуу байсан Land Cruiser–ийн дүр төрх танигдахааргүй болсон.

Land Cruiser 50
Төмөр гахай гэх хочтой энэ загвар ердөө гуравхан жилийн түүхтэй, 1967–1970 он хүртэл үйлдвэрлэгдсэн байна. 3 болон 4 шатлалтай механик хурдны хайрцагтай, 3.9 болон 4.2 литрийн багтаамжтай бензин хөдөлгүүртэй.

Land Cruiser 60
1980-1990 оны хооронд үйлдвэрлэсэн. Дөрвөн дугуйгаараа маажих чадвар нь нэлээд дээшилсэн. Иймээс SUV буюу жийп ангиллын машин дотор хүчтэй өрсөлдөгч болжээ. Дотор салон нь үзэмжтэй болсноос гадна эйркондейшнер болон арын шилний халаагч зэрэг тоноглолуудтай болжээ. Энэ хооронд бас сая дахь Land Cruiser машин зарагдсан тэмдэглэлт ой болсон байна. Урьд нь ямар нэг загварыг үйлдвэрлэж дуусаад дараагийн загварыг нь хийж эхэлдэг байсан бол энэ удаад 60 загварыг үйлдвэрлэж байх хоорондоо 1984 онд Land Cruiser 70 загварыг нэгэн зэрэг гаргаж эхэлсэн байна. Манайд 60 загварын машин цөөхөн тоотой орж ирсэн байдаг.

Land Cruiser 70

By Joost J. Bakker from IJmuiden [CC BY 2.0 (http://creativecommons.org/licenses/by/2.0)], via Wikimedia Commons

Land Cruiser 70 -ийг 1984 оноос эхэлж үйлдвэрлэсэн бөгөөд өнөөг хүртэл үйлдвэрлэсээр л байгаа билээ. Land Cruiser 70 –ийг олон зориулалтаар, олон янзын бүхээг тэвштэйгээр үйлдвэрлэдэг нь бусад загвараас ялгарах гол онцлог болно. Тухайлбал зөөлөн бүхээгтэй, хатуу бүхээгтэй, тэвштэй болон цэрэг тээвэрлэгч (Troop carrier гэсэн англи үг. Арын суудалд зорчигчид нь хоёр ханын дагуу өөд өөдөөсөө харж суудаг урт вандан сандалтай) зэрэг болно. 3F төрлийн 4 литрийн бензин хөдөлгүүрийг энэ загварт анх хэрэглэсэн.

Land Cruiser 70 Light нь хамаарах тэнхлэгүүдтэй (чулак гэж бас нэрлэдэг) дөрвөн пүрш бүхий тулгуур эд ангитай. Иймээс бартаа саадыг ажрахгүй туулдаг. Light загвар нь 2.4 литрийн бензин (22R) болон 2.4 литрийн турботой (2LT), турбогүй (2L) дизел хөдөлгүүртэй байдаг. Ийм хөдөлгүүрийг Hilux буюу 4Runner–т ихээхэн хэрэглэдэг билээ. Зарим зах зээлд Bundera, Land Cruiser II гэх зэргээр нэрлэж байгаад сүүлд 70 Prado гэх болжээ. 70 Prado нэрийн доор сайжруулсаар 90 Prado болгосон байна. Энэ загварт анх A440F төрлийн автомат хурдны хайрцаг тавьсан байна.

1990 оноос эхлэн таван болон зургаан цилиндртэй турбогүй дизел SOHC хөдөлгүүрийг тавьсан байна. Таван цилиндртэй хөдөлгүүрийг нь 1PZ зургаан цилиндэртэйг нь 1HZ гэж нэрлэдэг.

1993-аас 1996 он хүртэлх Land Cruiser 70 ийг 3 литрийн турбодизел хөдөлгүүртэйгээр Европын зах зээлд голдуу гаргаж байсан бөгөөд энэ моделийг нь KZJ70 гэж нэрлэдэг.

1993 онд 24 хавхлагтай, 4.5 литрийн багтаамжтай, зургаан цилиндр бүхий 1FZ-FE гэдэг бензин хөдөлгүүрийг суурилуулж эхэлсэн аж.

1999 онд 70 цувралд үндсэн хэд хэдэн өөрчлөлт хийжээ. Урд үл хамаарах тэнхлэгт хоёр пүрш байрлуулж, хойд тэнхлэгийн нумыг илүү урт болгожээ. Ингэснээр явдал нь нэлээд зөөлөн, донсолгоогүй болсон байна. Булыг 6 болтоор боож тогтоодог байсныг 5 болттой болгож өөрчилжээ. Хөтлөх эд ангиудад хийсэн багахан хэмжээний хэд хэдэн өөрчлөлт нь найдвартай байдлыг улам дээшлүүлсэн байна. Урт рамтай загваруудад нэлээд шинэчлэл хийсэн бөгөөд цэрэг тээвэрлэчийг нь 78, пикапийг нь 79 гэх болсон байна.

2002 онд зургаан цилиндртэй, 24 хавхлагтай, турбодизел, 4.2 литрийн 1HD-FTE EFI хөдөлгүүртэй HDJ79 загварыг анх үйлдвэрлэн зах зээлд гаргасан байна.

2007 онд Тоёотагийн анхны турбодизел V8 хөдөлгүүр болох 1VD-FTV–ийг зарим орны зах зээлд гаргадаг 70 цувралын Land Cruiser–т тавьсан байна. Мөн бүх загварын урд талаас харагдах байдлыг нь нэлээд өөрчилсөн байна.

70 цувралын зургаа болон долоодугаар үеийн загваруудыг одоо ч гэсэн олон тоогоор үйлдвэрлэсээр байгаа билээ.

Land Cruiser 80

By warsame90 (Flickr) [CC BY-SA 2.0 (https://creativecommons.org/licenses/by-sa/2.0)], via Wikimedia Commons

80 цувралын Land Cruiser–ийг анх 1989 оны сүүлээр танилцуулсан байна. Эхлээд дэлгэгддэг арын хаалгатай байгаад сүүлд 1995 оноос эхлэн сөхөгддөг хаалгатай болсон байна. Land Cruiser–ийг нийт 2 сая ширхэгийг үйлдвэрлэж худалдаасан тэмдэглэлт үйл явдал энэ үед тохиожээ.

1990 онд хойноо хонины хонхортой, 3 эгнээ суудал бүхий 80 загварыг үйлдвэрлэж 60 загварын үйлдвэрлэлийг бүрэн зогсоосон байна. Хойд Америк болон Европын зах зээлд худалдаалагдсан бүх тэрэгнүүд нь фулл тайм 4 дугуйн хөтөлгөөтэй системтэй. Харин Япон, Африк, Австралийн зах зээлд гаргасан тэрэгнүүдийн зарим нь парт таймтай юм. 1990–1991 онд үйлдвэрлэгдсэн Land Cruiser 80–ууд нь нээлттэй төвийн дифференциалтай. Энэ төвийн дифференциал нь 4HI горимд түгжигдэх боломжтой бол 4LO горимд автоматаар түгжигддэг. 1992 оноос хойшхи ABS–тэй тэрэгнүүдэд гулсаагүй тэнхлэгт хамгийн ихдээ 30\%–ийн эргэлтийн момент өгдөг. Өмнөхийн адил 4HI горимд түгжигдэх боломжтой бол 4LO горимд автоматаар түгжигддэг.

1990 онд 80 цувралын Land Cruiser –уудад шинэ төрлийн дизел хөдөлгүүр тавих болсон. Land Cruiser 80–ууд зургаан цилиндртэй (3F-E) шатахууны ердийн цацалттай бензин хөдөлгүүр, мөн зургаан цилиндртэй SOHC дизел хөдөлгүүр (1HZ), мөн шууд цацалттай турбодизел (1HD-T) хөдөлгүүртэйгээр худалдаанд гаргах болжээ.

1993 онд 24 хавхлагтай, 4.5 литрийн зургаан цилиндртэй, сайжруулсан бензин хөдөлгүүр 1FZ-FE бүхий загварыг худалдаанд гаргасан байна. 1992 оны аравдугаар сараас эхлэн аралыг нь ялимгүй уртасгажээ. Урд болон хойд тэнхлэг нь цоожлогчтой хувилбарууд энэ загварт мөн бий. Америкт зарагдсан загваруудын урд тэнхлэгийн диференциал нь High Pinion Electric Locking гэгдэх электрон системээр цоожлогддог.

1995 оноос жолооч болон зорчигчдын агаарын дэрийг суурилуулж эхэлсэн. Түүнчлэн ABS–ийг суулгаснаас гадна аюулгүйн бүсний дээд дэгээг биеийн өндөртөө тааруулан дээш доош шилжүүлэх боломжтой болсон. Гурван зууван цагираг бүхий логог энэ оноос эхлэн хэрэглэж эхэлжээ.

1996 онд Дакарын раллийн нэг болон хоёрдугаар байранд Land Cruiser –ууд орсон байна. ABS болон агаарын дэр стандарт тоноглол болсон байна. Өөрөөр хэлбэл үүнээс хойш гарсан бүх Land Cruiser –ууд дээрх тоноглолтой болсон гэсэн үг.

1997 онд машин цуглуулагчидад зориулж Land Cruiser Collector’s Edition гэгдэх тусгай загвар гаргажээ. Гаднаа болон шалавч дээрээ Collectors Edition гэсэн тэмдэглэгээтэй, бүхээгний автомат температур тохируулагчтай. Энэ онд Land Cruiser–ийг үйлдвэрлэж эхэлсний 40 жилийн ойд зориулж Land Cruiser FZJ80 –ийг 4} гэсэн тодотголтойгоор зөвхөн Америкийн зах зээл дээр гаргасан байна. Японд 1997 оноос Land Cruiser 80–ийг үйлдвэрлэхээ больжээ. Харин 2008 онд хамгийн сүүлийн 80 цувралыг Венесуелд үйлдвэрлэсэн.